1978 SUNG PEI BIKBEK!!!
Kum 4 tontung Arts and Sciences University Mandalay ka sin lai se ka ngaisut kik te ka zaak na tuh mama zong om ka sa bua hi.Ka tel khat le tua 4 sung se ka khan sung nuam ka sak hun/ ngual tam te tawh ki thol hun hi a bangma hun khua tua hun nuam bang se ki nga kik nawn ngawl tuh ci a hi hi.
University kaa kipat Fresher kum se ngual thu malmeal ki tel tak ngawl tana a nop tuh bang nuam zo ngawl tuh bang a hi zong taawtaa myo tet khat a tuh se a nop na ciang khat le om vavae hi.
A nuam bel se kum 2 le 3 hun sung se ngual daan ki he zaw hiat ,ngual luheak kampau tawm mal tel zaw hiat lei kipan se ki luulee sak pian sung teng a hi hi.Kum 4 hong cing to vamuat te sang man leng koi sung zuan a nuntakna tuh koi bang kipan tuh ci daan thuak sung hong tum piapian zo ta nah nuam tak nawn ngawl thong hi.
December 1977 in Kei zong Pathian hesuak na le Nu/Pa/U te support na hang tawh Mathematics Major B Sc tawh le Evening Technology Engineering Class pan Mechanical Diploma ( March 1978) ka nga demdom lei hi.
Tua le bang seam tuh???Ka sin teng ki zang thei tuh maw??
Bangpo hi zong Inn/khua saang cia leang lothaw tuh ngawl thu dang om ngawl tuh..
Tua le Muster Roll khawng taw mun khat po eima le eima beak an nee thei tu ziam? Ta bang tuh zong om ngawl zen thong hi.
Tua hun lai se Kumpi nasep sim ngawl Lothaw tu hi a Kumpi nasep tuh se Kum khat a tul sawm sim na University pan Degree nga ka saap na nasep a ki saam se a za a sim bek ma hi tontung thong hi.Kum pi nasep a kisam thei se Ngalkaap Bu ci OTS /Palik Bu ci khawng veo hi a kum ciang tan lalai hi.Sang sya zong se PTA pan kipat vacin tuh kul thong hi.Lawm te PTA pan pan te tu khawng te Town Ship Officer ma suak ngawp napo lalaeau hi awng..Thuppi vaave sa ingh.
Tu bang teng kawm pan Germany pan ka U Vum Son kung pan Job Appointment khat Tembaw taa te tungtawn ka nga luilam hi.Tua Job Appointment se tua hun lai a tuh nasia mama a zan zong ka mu thei bua liang hi.Ngamdang Job Appointment tawh Passport ki seau thei ci se ka he lei hi.
Kawlngam Socialism policy hangin Passport se Kumpi te na haksa sak mama a University Graduate khat se Education Clearance ci in tulsawm a liau phot bua le pia ngawl zen hi.Medical Degree nga khat bang se tul sawm thum liau sak zen hi.
April,1978 sung Kei zong bangpo hi zong Germany pai na tuh Passport seau tong ci mit sii miai muai Zangkung ka tuak suk hi.Ta sia hun lai ka U Suak Kang se Zangkung ngun lang khat Dallah a Township Council lai aat a sep laitak hi a tuak pan ka kipan phot hi.Vaa na cia na lem lei ngawl tanah 43rd Street , Botataung a om Pano Kamcinthawng te kung pan nau om kawm in ka vai teng ma vaan in tha 5/6 sung khawng ka om hi.Innsaap/an neak man om ngawl a hong huu Pano Kamcinthawng te tung ka lungdam na ki son zo ngawl hi.
( Ka nau op te zong Doctor suak tawh hong nusia tawh ma hi zo ei)
Vuanyii te zum pan Passport seau lua form nga na tuh bebek ni 2 bang ka kan suk ka kan to te Form se ka nga thei lei hi.
Passport nga na tuh lai ki sam teng se..
Education Clearance lai
Personal Income Tax kum 2 piak khol na receipt
Gazette Officer 2 ii letmat thu a aamakhaan lai
Teen na Myonee Council/Palik recommendation ci khawng teng a hi hi.
Kei zong lai kisam teng ka vawawt se a sum bek ih saap vive hong hi to pai hi.
Education Clearance a tuh K-10,000 le Income Tax kum 2 a tuh piak khol tuh se K-1600
( Germany pan ka thasum nga tuh tung pan 5% ka na ziam maw a tuat sak bang khat hi.)
Tua hun lai a tuh in K-10,000 thong se tam mama ki sa a Zangkung khua sung sum nei tuh muanmawk mealheak tawh mealheak ngawl tawh tung ka tai kakawi se ka nga zo mama bua hi.A tawpna John Thet Kyi ( Kawlngam sung Tapidaw kipawlna Ulian) dong ciang ka theng hi.
Bang veo hong ci ziam ci le ta za sum Tul sawm nei leang ngamdang pai kul mama ngawl a vawt thei tuh tam mama tuh hi veo hong ki ci hi.
Ka cimawk mama te ka U Lian Kop Cin tawh Germany Embassy khawng pai in huu ka ngen thathaong zen uh hi.Phatak ma paupui in bangpo hi zong Passport nga phot ta vun a hi po le a dang se ki vaihawm thei tuh hi ci bilbel vanglak hi.
Ta bang teng tawh September tha hong theng a Tamdeang ka Pa kung pan ka Nu cina a zawm thu le bangpo hi zong khat vei peuma khua cia phot lilim tan ci na lai khat ka nga hi.
Passport seau lua teen na tuh lai kisam teng la sum om ngawl bangma vai ki zop thei ngawl tawh ciang ka Pa le Nu mu tuh in ka cia to hi.Topa na ka Nu le Pa maitang hong mu sak lai nuam a hi hun lam ka nung tel saan hi. October 12, 1978 ni in muanmawk ngawl het in ka Pa na hong nusia vetvot hi.Cina lup na tung ngak a hi zaw ka Nu zong na December 12, 1978 te hong nusia laleau a ka Leitung Pathian teng a bo hong suak hi.
Tu nungsang te ka heak kik thu pawl khat..
.Tua hun lai Kawlngam Passport tawh Germany se Visa kul ngawl kipai thei na hi nginge hi.
.Thailand/Bangkok pan tua hun lai Kawl Embassy te tung pan Kawlngam Passport se Kawlsum tul 2 khawng tawh ki lei thei na hi nginge tuak hi.
Bangpo hi zong tua hun lai Germany ka pai thei ngawl na tuh thu tatuam hong om sak Topa tung lungdam ka kao kik zaw hi.Banghang ziam ci le tasia hun lai Kawlngam pan pusuak pai a hi leng mealheak U le nau pan kipan Kawlngam thu le la bang mama he ngawl a mipui sapui Zi le Ta zong ki nei ngawl tha tuh hi.
