USA -U Start Again-(First Step-Start!)

USA ih long form se U Start Again..hong ki ci te bangteng tatak zong a hi thong tam a ka ci le,,( Start na First Step)

Cidam Zangkung pan leang BKK..Tokyo..Dulles Airport...US ka thet tatak te,

America USA a ci se Kawlngam pan ka muanmawk pawl khat na hi vet ngawl thong hi.

Kei bang America ngam a teang mi te se,

Mihing theampo a hi sitset ki thawi tu ka um tha hi.

A meal sia/ei bang liakluak khawng om tuh zong ka um bua hi.

A kuama po zong mangkam puak vazia pau thei tek tuh ka lam en hi..

Naseam/Kuli khat zong na ama kupaing mawtaw tawh naseam kuan ci se ka up zawk ngawl thu hi a/movie sung khawng bek ma hi a a takpi hi tuh ka um bua hi..

Tu te theampo khat zong a hi ngawl /a maan ngawl hunlam se US ka thet zawk tawm vei po te ka tel hi.

Aw keima na USA se Vantung ngam sa tha heihoi thong ka hi hunlam ka phawk kik hi.

Keima le keima ka ki muanmawk se. kei zong Mangkam pau mun khat theng paopao leng a lulu Mangkam pau thei zang thei tuh ka ki up ma khial bel ka ki sa hi.
Mangkam thong se sin /hanciam ngawl a ki he zo/a ki pauthei tuh vazeang a hi ngawl na US ka thet teh ka nung phawsaan thong hial si po hi.

Ei uk daan bang hi le thet khuavak ni koi sung nasep om ziam ? Sum ma kisam phit, leiba tawh kipai, Innsaang mealheak te en nuam sii tanah ih khuangaisut maksak bel se nasep zon tuh a hi hi.

Na theampo se ei muanmawk bang khat zong hong hi ngawl thong hial hi.Tabang nasep ki zong thei pai ngawl a, nasep thei na tuh Work Permit a kisam a Social Security Numbat nei phot kul hi- hong ki ci te, Kei tabang papui nasep zong ci bongh ..munphiat/cleaning po..Kuli po hi lel tuh ve kei sep thei tuh ..ka ci le..tate theampo se nasep kici hi..ci hong ki zo hi.Sum thalaw/Sum nga na nasep theampo se nasep ( job) ki ci siat na hi nginge hi.

Tua le Social Numbat/Work Permit koi bah nga thei tu ka ci laleau te..nang US se a haw pak/Leangna pak bek na hi te na nga na tuh lampi om ngawl po ve..hong ki ci laleau hi.
Kei se ka U Son ii ama kung haw tuh hong saap na tungtawn Visit Visa ki ci a haw pak bek ma ka hi hi.Ih tup ih sawm ahi le teensuak tuh ma hi phot meak ve maw..

Kei mai hiat a US a na theng Lian Kam ( Thangthukapa) se Intensive English ( Manglai sintuh) kaa tuh a Student Visa a nga hi ta nah Social Numbat nga thei a ka enn daan /ki hang leng nguksak daan khawng om le ci ngaisut hun zong om zen thong hi.

Tu teng hang pan ma kipan..US theng khat se a ki pat cil na a bul pan tatak ma kipat sia ma hong kul na hi nginge hi.

Work Permit nga thei na tuh lampi om susun se..

1.Pilna/thiam na US a om a sa te saang saangzaw, thiam zaw na hi le naseam tuh hong ki dei mama le Company te na sponsorship pia a Work Permit ngasak thei hi..Ei khawng kuana hong sponsor lei tuh maw??

2.Tangval lai khawng hi leang a US Citizen khat tawh teang thei leang tasia tungtawn ki nga thei hi ci…Ei pawl Zi tawh Ta tawh hi zo laleau..

3.Eikam a Suutpom a kici..Political Asylum seau tu bek sim ngawl thudang mama tawh work permit nga thei na tuh lampi a om ngawl suak hi. Ka ngam pan hong ngaltai khi hi, cia kik thong leng hong ki dawm ngawl tuh a hi te nong hesuak na tawh US a hong teang sak tan ci a ki seau suak hi.Polical Asylum a kici se Kawlngam khawng om lai Kumpi zalian tatak/Vuanzii khawng te bek ii seau thei le nga thei ka sa zen thong hi.A tatak se mihing khat hi na le a kikim hamphat na hong pia thei ngam na hi zen thong hi.Tu bang thu US te a nei se kei a tuh bang lamdang mama kasak thu khat na hi hi.


A masa phit bel US a legal tak om thei na tuh thu le la kipat kul ci na a hi hi.( First step—Start)

Kei zong ka pai lilim sia teang suak tuh/Innkuanpui te a manlaang thei bel sam tuh ci ih tup ih sawm a hi bangma Political Asylum seau tuh ka kipat te , U Son ma na ..US se nang ii muanmawk bang nuntakna ol tuan ngawl hi.A tawm bel tha 1 tha 2 bang peuma en kakawi in na, na thin zo tattak hi na ci te Asylum seau pheang tuh ni hi..hong ci hi.
Khensat sa pai ka hi bangma July 24 ka thet se August tha bo ma Asylum seau lua na teen thei hi.

US ka pai mama lilim Kawl kumpi na se nasia tatak ma hong en cik hi a Tedim pan ka khualhaw tuh sim report hong kipia sak hi.Ta bang thu khawng se US kumpi na thupi laak peuma bilbel hi.

( Hong encik bel se Tedim a MI san thum pa hi a Khin Ngunt kimaat te ama zong ki man a, Kawlpi a kum 6 thongtaak tuh thukhen na a nga ci nung zak ingh.thinnuam tuan bo)

1980 kum a Suapuipa Aizawl sang pan Khua a hong cia na tungtawn MI te thudok tuh hong zazon se Aizawl saang ka om sung hi a,ki peal lei hi vaak ci kasaap 1984 kum kei tawh U Cin Za Kaap le Lian Cin Hau( Haukawi) tawh ka unau thum , permit nei ngawl ngamngi kaan ci tawh Tedim tazazii zum ah thu hong vawt vavae a, ni khat bup thongtaak tuh thukhen na ka nga hi.Tua thukhen na se kumpi naseam khat hi leng zaataan law tuh ka hi hi.

Kawlngam 1988 kum buai zawk Saw Maung i Political Party ki phuan thei a ci na tungtawn NLD hong kipan a Tedim zong manlaang tak ma NLD ki phuan a kei zong ka na ki hel titut lei hi.NLD ma na zo kol lei kasaap power lah a ki aap ngawl te NLD papao se kumpi langpang ki suak a paulaap nuam mama khat hong suak hi.Daw Suu kutaing letmat thuu ID card ka puak kuu khinkhian se hong ki zang thei peuma a Topa na tute theampo zong hong ngeal kholsak hi nginge ka cici hi.


Hi bang thu teng ma aat a Asylum ka teen se September 28, 1995 ni Asylum Officer te khat na Interview hong vawt a kamphen tuh tupapa Nyi Nyi Lwin ka cial hi.
Hong thudok masak phit bel se…Na zi nei ni le tha kum..ci a hong dong a, ngaisut vet kul ngawl ka zo thei hi.Theamna khawng tawh Zi nei ci khawng teen hi ka po leang ki buai thei mama tuh daan hi.

Ka taangthu aat teng ma kipat pan a tawp dong hong dok thong se eima thu hong ki dong takpi zo thei ngawl dedek khawng om lalai hi.A hi hah thin muan mama na khat ka nei bilbel a Topa zong na zo tuh daan hong hil ci ka phawk kikik hi.

Oct 2, 1995 Ni date tawh Immigration Zum pan lai khat hong theng a na Asylum seau sia Approve a hi man US ngam sung ah na uk tan vei( ciangtan om ngawl) na teang thei a nasep zong na uk bang seam thei ni hi ,ta sia sung ah na Innkuan pui te theampo zong a ki hel hong ci te ..aw US Kumpi te awng thuthiam lalawm uh tei .Topa na thupha namcin hong pia thua lai hen.ci tuh ngawl thu dang mama a om bua hi.

Ka nungphaw thu se ..US ah Asylum hong kipiak se US Citizen dong hong ki pia khol to pai hi a US ngam pan a piang mi khat tawh ki bang US kumpi tung pan hamphat na theampo zong hong ki pia/hong ki ngasak hi zezen thong hi..NA SIA LEI /THUPI LEI sa ngawl nu????

Hi teng se US a First step…Start na hi a second step nasep daan zom lai tong maw..