Tuma Kum 40 lai tu ni! 23rd December 1971.

Tuma Kum 40 lai tu ni! 23rd December 1971.

1968 kum Private Dolluang Middle School pan tan 7 ka on zawk te uk zong uk bua zong High School se mundang khua dang kaa ngawl phamaw thong hi.Tua hun laitak U Suakkang se Thuklai Myonee khuai laiaat seam a Zi ka Unu Ni Neam ( Thang Neam-Mid-wife) se Tonzang a sep laitak ahi hi.Kei zong Thuklai kaa tuh daan in Tamdeang pan ka U Cinzadal tawh ka pian na Pu te a khua Thuklai ah ka pai uh le Ka U Suakkang ama Khuang Thuan ( nungsang te Nuneau te khat tawh teang) tawh Laito nuai Inn khan saap khawm in na om hi.Zan khat taam a ka om te ka thin mama zo zo ngawl in a zing te Tonzang koi bang hi ci zong he tuan ngawl se Tonzang ah ka Unu kung pan High School kaa tuh Tedim zuan to se Tonzang mawtaw na om lian luilam se nikhat thu Thuklai pan Tonzang ka theng suak uh hi.

Tonzang se High School nga thak hi a tua kum mama Tan 10 dong a koi phit kum hi sii na sangpatang tam thethei a dei laitak hi a, ka U Dal zong tan sawm kaa tuh ki admit thei sii ka Vungkhai zong nau om sii tanah nuam ka sa mama hi.

Tan 8 zong nuamtak ma zo a Pathian hesuak na tawh Maths distinction tawh ka ong deap hi.Ka Math sia se Sya Tual Ngo hi a ama ma zong Math thiam mama minthang khat hi a, tu dong ma ka mangil thei bua hi.Limkhai Sang Syapi a sep sung khat vei Tedim hong haw luilam a, an ne khawm in Hangke khat tawh lungdam ka ko se kei saang ama lungdam zawlai a hampha ka ki sa mama hi.

Tan 9 zong Tonzang ma kaa kik tuh ka ci laitak Tonzang zato Taihnee Zato hong nga to te Ni Neam post tuh om nawn ngawl tanah Ngam Ngai Health Center ah piangsak hi.Pathian ngealsak na ma hi tuh ve ka uSuakkang zong Tedim Myonee zum ah hong theng to bilbel tanah Tedim ah Tan 9 ka zom hi.A kum kik 1970-71 zong Tedim ma tan 10 zom se Khua pan zong Thangbawk ( Kipkothang- Tedim) zong tan 8 kaa tuh a U Langhcing te kung hong om to tanah ka ngamlum zawhiat uh hi.

Tedim pan khua se ni khat veo ki theng hi tanah sangkhak po le ki cia nuam vadal mama hi.Zingsang Tedim pah kawl tuak mawtaw Thuam mual lamka dong zui leang bang sun nai 1 nai 2 khua ki theng tanah kilawp mama hi.Second term lai huan se December 23 ni zingsang nai 11 ki man tu ta na Thangbawk tawh Lungdam vawt siim a zingteh December 24 ( Vokngaw ni) cia saang tua ni cia tuh ka kiciam uh hi.

Banghang ziam ci le Khua saang pan 24 ni se Lungdam vawt Vok ngaw ni ki ci liang a Vokngaw ni ki hel tuh se kilawp mama hi.

Thangbawk tawh ka kiciam uh bangma koma 2 nguak hi zong cia tuh ka ci uh le Ka Innveang Halka te Sangsia Chaw Uk naupa Thawng Uk a ci sia na kong zui tuh hong ci
te thum pha tuh ci tha ka nga saseam uh hi.

December 23, 1971 Nai 11 laihuan man nga ngaw Inn a, van ki thawi sa teng zam lian ka din uh se Kawl tuak tuh mawtaw teng la ding siat zo/Koma thum peang tawh Lawibawl-Leilum-Sezaang-Dimlo-Hawp pan Thuam lam zui to—Thuam lamka ka thet uh sia Nitak nai 6 kiim sat khuamial vacit tuh kipan zo hi.Kozong kitaa pian ka hi mang tuh ve ka la heak theampo uh sa ka taisuk ngawp uh se Tuisau-Vando-Tuivial dong ma tatsat vet ngawl lasa au zo zen khu hi.

Tuivial khua mual pan Khua na et uh le Khua sung meipui dee Innlak vaak ki ngal mu se toi bang thai liang zen thong hi.Nai 11 khawng Inn theng a Zan vaak te zong a man bek lian Innkuan pui te tawh ki mu se Leitung khankhat sung hun nuam mama khat ci tu dong ka mithaa sung mangmaw lai zen hi.Ka Nu na Aksa taangmaal na huan a tasia ne kawm muanmawk ngawl het ka thet uh thu a lungdam dam daan—hong son se ka bilthaa na tu ma za thei lai-

A Zingsang te Pu Mang – khaih khaih khaih Vok ngo tuh kipan ta vau..ci hong au a U Kaap te Inn Vok ngo tuh hong kuan khua pui te ii upmawk ngawl het hong mu vaat a, lamdang a sak khawng nuam ka sak daan---

Ka Sangka pui Lasa/Laphuak minthang Sai Htee Saing ii – Ka Nolai lai hun bang nga kik thei leng –ci la ka zaak sim hi thu te phawk kikik ingh.