Zan khat taam tuh Aizawl ka pai le Kum 4 taam!!

2002 ziam maw 2003 ziam maw ka Birthday a Tualpi Nu na nau te pawl khat tawh, College Park, Route 1 tung China Buffet ah an hong neak pui a thu sason se Lt.Col Son Ko Pau thu ka son tha luilam uh hi.Pu Pau ama Kum 26 a phak a Lt.Col nga zo ci thu son se nau te khat na nang ee Kum 26 na phak lai bang na seam ziam ci luilam..Tasia lai ama zong 26 khawng ma pha daan hi.

Kei zong ka ngaisut kik te kum 26 ka phak( 1981-82) lai tak Falkawn High School, Mizoram ah Acting Headmaster ka sep hunlam ka ki phawk kik hi.

1978 Kum se kei a tuh ka khan sung ka makngil thei ngawl tuh kum hi luilam..October 12 ni muanmawk ngawl het ka pian na Pa na nusia ..tua zawk tha 2 a cin lian ni December 12 ni te ka pian na Nu na hong nusia laleau.
Nu le Pa om nawn ngawl te lonely( lukhat mama ) ki sa vahai thong hi.

1979 Kum hong thak khua khawng a om tuh hang zong nuam ki sa tuan ngawl tanah tasia ci vacin zong om tuan ngawl Tahan zuan hi pong..

May tha sang hon kik te Tahan pah pang in Pyinkhunglay ah Affiliated Middle School ah lai hil tuh kipan se upmawk saang hoh nuam kik bilbel hi.Ka sep pui se Kam Ko Zam ( Tahan-Vangte) a hi zong Malsawma ( Tahan) a hi zong Pari ( ZODI Singer) le Kawlte Ngaknu khat hi lai ve a min zong he zo nawn bua thong nge..ngualnuam thei mama bilbel..Pyin khunglay Khua se minam kim ma teen na khua hi a pau se Lusei kam ki zang hi ta nah Lusei kam sin na khat hong suak bilbel hi.

Kum khat ci se tawm vei cing laleau bilbel a te USA U Son tung pan lai khat nga a Aizawl na pai leteh Prof Siamkima a ci khat ka lawm te om ve India passport khawng na vawt nuam le hu thei tha tuh ve ci luilam a kei zong lawp tak ma Aizawl, May 1979 sung ka zuan thathaong hi.
Aizawl ka thet te ..ka sang sia sep sung ka Lusei kam sin teng zang thei ngawp tuh ka ki up mawk se suak zo tatak ngawl thong na poi peuma.

Zarkawt a Comfort Hotel a kic na ngiak a te zingsang te Hotel nei te mun Prof Siamkima tawh ki mu tuh kong pai ve- na he ngei uh ziam ka ci le.. he khu hi ..Venghlui a ci na teang hi ci… pai daan tuh teng hong son thei bilbel a lungdam daan ki son zo ngawl hi..Kei zong peang tawh lamseau a zong phei pai ka hi le haksa ngawl het ma Pu Siankima te Inn theng pai se ama khual na haw a hi man tua ni taam a ka ngak hi.A Zi a hi Pi Rengchhawni na se mealheak tatak ma hong vawt pai a ka om daan hong nuam pai hi.

Pu Siamkima se ni dang Haka ngam Tiril Khua a Middle School Headmaster hong seam ngei le Tahan dong khawng zong hong pai ngei khat na hi luilam a Halka kam na thiam peuma hi.Cotton College, Gauhati pan Master a nga zawk te University of Illinois’ pan Literature sang Master ma a nga kik mipil mama khat na hi hi.Tua hun laitak Mizoram Education Dept ah Deputy Director a sep laitak hi a,Kawlngam om daan /Kawl kumpi thu se na he mama hi. Math Major tawh BSc nga ka hi thu ka son le ..kawlngam mama cia kul bo Keima nuai a sangsia seam in..tha sum Rupee 1000 vaal tawh kipan tuh ni hong ci thong se ka mang ziam ka tak ziam he ngawl za dong ka luangdam mama hi.(Tua hun lai Kawlngam thasum tam bel sia K-800 hi a Rupee 1000 se K- 1200 tawh ki kim hi lai hi.)

A hi hah Lusei kam tawh Lecture pia thei tuh dong kampau na thiam phot kul tuh a hi te tha 3 sung kamsin in hong ci hi.

Kei zong tua ni pan kipan Aizawl khua sung a ki hawm Tadensaa nam 10 kiim bang se a pat na pan a tawp na dong sim/mu po paupui ci bang ka sin hi.
Tua hun lai Aizawl a kawlngam mi se tam lalawm ngawl lai deap a khualhaw khat po ni po tawh ki mu thei bek hi.

Mizoram Sang te se a tam zaw private saang hi a ahi hah sangsia te thasum se Kumpi tung pan grant veo nga a tasia tawh a run na hi nginge hi. Kei zong mun 2 mun 3 khawng Interview pai se Lusei kam le Mangkam veo bangza pau thei ci veo hi a ka nga pak thei bua hi.July 1980 te Falkawn H/S Board te na hong la a tha sum Rs 1200 tawh ka kipan takpi thei lei hi.Sangpatang se tan 8 pan tan 10 dong 60 kiim khawng bek a pha a koma Sangsia 4 Off period om vet ngawl ka seam hi.Kei a tuh se ka thasum tam mama sa lel tanah nuam kisa phot na ve tawm vei ciang se sang dang te ni khat period 3 po tawh ko saang a thasum tamzaw nga ci daan heak zawk te datham sak peuma thong hial hi.
1981 sang hon te ka Headmaster se B Ed training hong pai te kei Acting Headmaster ka suak liluu thathaong hi.Haleluija!

Acting Headmaster ka sep te zum vai tawh District Education Office veo thasim report pia ka pai na tungtawn Syapi tam ma tawh ki he se Aizawl khuasung sang K V M High School te na hong sam a 1982 June tha sung ka join hi. Tha sum la 1600 nga sii ni khat period 4 kan zong hil om ngawl tanah nuam ka sa mama hi.Zingsang zong Coaching Class ci a Private tan 10 phii tuh te class hil sii tanah kom mama ka nei bua deap hi.Ta bang ka sep se 1984 June tha dong Calcuutta a US Visa seau tuh ka pai dong ka seam hi.

Aizawl zan khat taam tuh ka pai se Kum 4 sung ka taam thu se tu bang teng zei///

Tu khawng ka ngaisut kik te Topa favor nasia attak a saang khat ka hi hunlam ka nungphaw sasaan hi.Kei bang lel Kawlngam mi khat Aizawl a Innteak tatak ma ka om thei a ka uk ka nop teng nuamtak ka seam thei hi.Lamkhat pan tabang ka om thei na tuh ka background se God Father ci leang ki khial ngawl tuh a hi Pu Siankima te Innkuan hang hi a amate Innkuan tung lungdamna ki son zo ngawl hi.