US visa tum tu Calcutta ka pai le Sumvawt suak!

US Visa tum tu Calcutta ka pai le Sumvawt suak!

Aizawl a sangsia ka sep sung ( 1981 kiim)India Passport Rs 200/- bo ka seau se bangma haksatna/thudok mal khat zong om ngawl ka nga pai hi.Haleluija!
A tatak ka nung heak kik te Pu Siamkiam na thukan te tung keima nau hi ci hong recommend hang ka nga ka hi nginge hi.

Kei zong Kawlngam pan ka nga zawk ngawl Passport a ki ci ngamdang khualhaw thei na ka nga te keima le keima nasia ka ki sa lilu mama tha hi.Ka PP nei U Son ma zasak pai a ka hi le ama zong na US pai thei na tuh lampi om sun Intensive English class kaa tuh I-20 hong then pai vanang hi.( I-20 ci se US a ngamdang pan sangka tu te sapna hi.)

Kei zong I-20 ka nga te Visa ngasa ki tuat pai laleau se ka sangsia sep na pan tawlnga, Calcutta ah US pai suak tuh daan ka pai hi.Ka nasep pui te 2 na US paisuak thei tuh sa tanah hong zui deap a lungdam na ki son zo ngawl hi.

Kawlngam pan Aizawl dong nutset tuh hong del to Thangno( Thuklai) tung zong lungdam lalawm a ka ngaisut kik te lamdang sak saan kik ingh.Ama Poona University pan a sang man zawk bek hi US khawng ma zong a sawm khawm ka hi deap uh hi.

Silchar dong MST Bus to suk..Silchar pan Calcutta Vanleang Airbus 737 tawh ka len se Air Bus ka khan sung ka to phit hi a nasia ka sa mama hi.

Calcutta vanleang kuan se Dum Dum kici a vanleang tung pan lei ka sik te kei zong India ngam sung om ka hi hang ngamdang pai attak ka kisa pheang a, nidang mealheak sung sumvawt khualhaw a hi Pa Hau Son Za Hau te Pu Lam Tun Lam te ii Bombay/ Calcutta a cici se ka phawk mama hi.

Calcutta Mizoram House a zin tung tuh ci ka pai uh le Room khat zong awng ngawl tana eimi sum vawt te tun na a hi Kunga Hotel zuan se eimi tam tawh ka mu pai uh hi.

Kei zong ki muang mama a US consulate a Visa tum ,Form teng fill up / kei muamawk tawh van le lei kisam ,kam thum zong thu dongh ngawl sorry Visa pia thei ngawl tuh khi hi ci ziau lel tak..

Ka khan sung ka thinkiam le ka khuangai bel ni khat ci ka ciamte hi.An zong tui zong ne zo ngawl ka zin tun na Kunga Hotel ka lawm te 2 tawh ka zuan pong uh hi.

A tatak se thu ka heak ngawl lalawm hang hi a Ka sangsia sep tawp ngawl zaw a Mizoram Govertment te ii sawlna lai khat vawt leng Visa se a ki nga lalawm tuh ka hi nginge zen hi.Tua laitak Mizoram Education Minister F.Malsawma hi a ka Innteak nu suapui seal te khat hi.Chief Minister zong la tu laitak a seam a hi Pu Lal Thanhawla ma hi a, a Zi Upa se ka sangsia sep pui hi lalai hi.ci nopna na Topa na lem sa hi le a lampi tuh se om lalawm ka ci nopna hi.)

Tua ni tak Kunga Hotel mawk sen sai a an ne tuh lawm te 2 tawh ma pai se ka muanmawk ngawl het Tahan ka om lai khangno makai Sya En Khan Nang tawh ka si luilam uh hi.Ka thu teng ma hong dong a ka kison se US mama pai kul bo..sum vawt leteh nuamsa mama tuh ni zam hong ci hong hanthotna tungtawn sumvawt sung theng ka hi hi.US pai na tuh ka sum ken se Rs tul kul hi deap a sumzian cing mama lel zam hong ci se tha nga cip a kipan ka hi hi.

Tua kum sung teng ama ma tawh ka sum nei sun teng ngawm a Calcutta pan mawtaw van puasuk..kawlngam pan Japan nai ( Seiko) khawng ci bang pua to se Bhutan khawng ah zuak to ci bang teng tawh kum khat se hong cing to pai hi.Thangno zong kei hong nutset Aizawl hong pai na pan Zangkung dong na paisuk se sumzian tuh honkhat ma hong nga a tateng tawh ma hong kipan se 1984 kum bo te ka 2 ka sum nei theampo ngawm ki thawl suak ka hi uh hi.

Kei Aizawl ah kum 4 bang ma om hi lei sii..ama Poona University a kum 4 ma sangka hi lei sii tanah India sung se ka Innteak vapum mama bilbel uh hi.India Passport zong nei khawm hi deap khu zei!!Nasialua!!

Tu bang teng tawh Zangkung /Calcutta/Bombay ki le suk ki le to ka vaak uh se kum 10 sung ma cing man thong hi.Tasia sung Zi zong kei a tuh a phabel nei man/tapa/tanu zong Topa letsong saangman khi hi.A tatak se US Visa tum tuh Calcutta pai lalak se Pathian na na nuntak bulpi kipat na tuh sum vawt lawka sung hong thun a na hi nginge hunlam tu khawng te ka nung phaw sasan hi.

Tua hun lai ka tup ka sawm bang US khawng theng hi zezen leng tu ka nuntakna koi bangh a hi tam..Sizang Innkuanpui ma ka nei tam..Sizang mi u le nau tu za tawh ka meal he tam..Tu dongh khawng Zi ngala po ka om tam ci se ka ngaisut kik te…..

TOPA PATHIAN na kei a tuh a hoi bel tuh le a pha bel tuh hong ngealsak a hi na thu ka phawksan kikik a Haleluija ka ti lo thei lo a ni!.

1990 ma hi a US ah Ei mi se U Son sim ngawl zong om ngawl thong vei tam..

(Mizoram a Sangsia seam a Lusei kam dei bangka pau thei huhau zong tu khawng te lawm le ngual hauna ka nei baan ah tu mama ka nasep sia zong a nga ka hi lalai hi.)

Na theampo a bit phua a ka nuntak na ama dei bang hong zeak Topa minthang pok ngawl in ka om thei bua hi.—Praise the Lord!!