KA SUNMANG( DREAM) Kum 20 kiim te taangtung

Ka sunmang( dream) kum 20 kiim te taangtung !!Praise The Lord!!!

Keima tup le sawm bang Topa na thukim pui a taangtung hi thong le 1978 kum Mandalay University pan ka sang man po te Germany pai a nasep a sum zon tuh a hi hi.Job Appointment Letter se tua laitak Germany a om U Son tungpan ka ngasa a hi hi. Painting Company khat a nai khat German sum pheak 5 tawh nipi khat nai 40 sep tuh daan a Kawl kumpi tung kum 2 sung Income Tax piak khol tuh hi deap hi.

Kawlngam passport la sum tul sawm puuk tuh ka nga ngawl man ka nga thei bua hi.Passport nga hi leng Germany Visa kul ngawl ki pai thei nginge//

1980 kum te Aizawl pai to Sangsia sep sung India passport ol no tak nga ka ma leng US Visa nga zo ngawl laleau ci teng tawh sum meet del a Zangkung /Mandalay/Calcutta/Bambay ka ki le se kum 10 ma cing to thong hi.Ka sum vawt daan uh se Zangkung/Mandalay pan Kham( Gold) le Ngun( Silver) lei India ki zuak to hi.A tatak se ngamdang sum( Rupee) suak thei tuh ci na hi.Tua sum teng tawh Palee( Pearl) /Diamond/US Dollar ci bang lei kik a Kawlngam ki zuak kik hi.1990 kiim khat vei bang se ngun pua to dollar ka puaksuk uh se percent 40 bang a meet hun zong om zen hi.Ngun se van lian mama tanah Mandalay pan Calcutta dong mawtaw tawh a kipai a a kipua hi zen hi.( A tamzaw koma kutaing ki hawl hi.)Ngim huai mama bangkhat a hi hang tasia kaan a meet zaw sum vawtna se tam lei ngawl tha tuh ci ngaisun ingh.

Tua hun sung teng ki laklaw kuama zong na a lal/taak zo nawn ngawl phial tuh a ki ngaisun Kawlngam Socialist Party bang zong hong bo a..Kumpi thak Policy thak hong kipat kik te thu le la tam mama kilai man hi.

Kei zong Tedim a Innkuanpuinu nasep na tungtawn om lalak se Mah Sah Lah hunlai a political post lian mama khat a ki ngaisun Myonee Tamah ( Township Co-operative)ah Secretary khawng zong kum 2 sung ( 1988-1990) sung ka seam liluu manpo sii hi.Tua hun sung zum nasep daan ka heak/sin teng zong US ka thet zawk FDA( contract) a muanmawk ngawl het nasep ka nga te nuamtuam sak mama luilam a, na theampo se Topa na a huhun hong hil khol ci ka saang a Topa minthang ka pok hi.

Kawl Mangthu zong tam maa hong kilai a, Kawlngam Passport zong se hong ol sak va ial bangma ngamdang pai asum thalaw hong popular va ial hi.1990 kiim bang se Japan a sum thalaw a om khat ii Innkuanpui te se nuntaak nuam mama hong suak hi.

Sum vawt na zong tam mama ki lai a Bombay khawng pan diamond zuak tuh Zangkung khawng hong pai thei thong te ei sep thei tuh hong om vangau ngawl tanah Sen ngam /Musee saang Mawtaw po zuak a kipan kik se theam po ki thuak niknek lalai tanah ci law he ngawl ka om lai tak US Visa tum thei na tuh Topa na hong ngealsak luilam hi.

Tua hun lai Sen ngam ka puak uh mawtaw se—Mercedes/Honda Accord/Mitshubishi Pajero ci khawng teng hi deap a nasia thei limlum mama bilbel hi.

Kawlngam Passport zong se Suapui Kam Za Pau( Cingcingpa) ( Perth-Ausie) Zangkung a Travel Agent Company a vawt lai ,ni khat ka haw le ..Kong huu thei na dang he bongh ngi..Passport a thong vawtsak thei tuh khi hi..Na matpungten copy nuasia tan na Passport zum ah Datpung na ki zai leteh hong ci na tungtawn ka nga hi.Tua ma kum 10 sawm vaal lai Tul sawm ngawl tawh ki nga ngawl se Passport a thong hong vawt tuh mealheak ngualtam ka nei zong Topa tung lungdamko tuh sim ngawl thudang om ka sa bua hi.


Tu bang teng tawh India saang sum vawt la piang thei tatak nawn ngawl..Sen ngam mawtaw zuak na sum teng la theam thuak, ci law he ngawl Tedim a tawlnga kawm Tualpinu ii –Miehtaamuan Datkhuaikhaan –( Labolatory Clinic) vawt sia po ngak ka om hi.1994 kum bo lungdam vawt sung khawng khat te US pan U Son ma na Aizawl a haw tuh thu le ki mu nop thu lai khat hong then laleau hi.

A lamdang mama thu khat se 1986 kum June tha sung Zo History Laibu vawt tuh in US pan U Son Calcutta hong pai a, nipi khat sung Zo History buaipui ka unau ka kithawl uh hi.Ama ma na US Visa hong tum pui le lamet a om thu zong ka kikup uh te..
Kei ma na-Kawlngam pan Zi khawng ta khawng ma hong nei phot leng a ka kum kum 40 bang te hong pai pheang leng ci ka ngaisun ci..ka zo kik se lamdang sa si khuangai mama si luilam hi.Ama kung a pai nuam ngawl daan ngaisun hi.Tasia hun lai Tualpinu tawh se a ki he taciang bekma hi a ki teen tuh za dong zong a theng ka hi bua lai uh hi.A hi hah Topa na ka kampau se nguaksuak sak ngawl in, ka ci bang lian taangtung in Innkuanpui nei zawk ka kum kum 40 cin zawk 1995 July 24 ni in US leitang ka sik hi.Haleluija!!

1995 Kum March tha sung Aizawl a U Son tawh ka kiciam uh bangma nuamtak ki mu in Nipi khat sung khawng ma ka ki thawl uh hi.Keima sum vawtna/ka Innkuan omdaan teng ka kikum a US Visa ka tum nop thu ka son te,US a thet kik po te Visa tum na tuh lai kisam teng Zangkung a hong thak tuh ci teng tawh kei zong Tedim ka zuan kik hi.Ka ki son sa bangma May tha sung US Visa tum na tuh lai kisam teng Zangkung U Cingh Neam te kung na theng pai a Rev. Thawng Khan Khai tungtawn in Tahan pan tua lai ka nga hi.

US kong pai thei zezen tuh a hi le bang teng kong ki nging tuh ziam ci ka dok te..
Puansil niikteen ki ngin om bo..Na Driver Licence le na NLD Member Card hong keng leteh nungta thei tuh ni zam ..ci hong zo a, tua lai ka tel ngawl hang a mun tatak ka thet te tua te 2 ma thupi bel hong suak takpi a tua te theampo zong Topa ngealna sa om hi ci ngaisun ingh.( 1990 kum Kawlngam sung Party ki phuat thei po te Tedim NLD phuan phit sung ka ki hel na tawh NLD member card Daw Suu kutaing minthuu ka nei deap hi.)

Kei zong a manlang thei bel le ka ngin thei za tawh June tha bo Zangkung tuaksuk se Zangkung a tual tel zawhiat a hi Pa Pau Ngin Do Pau lamlak na tawh Paassport thuk/Visa tum na lai teng Sitnii tawh ka vawt hi. ..Sitni pa bang na –US Visa tum tuh ka vawtsak tam mama sung hi bang za a pha/muanhuai tam ngawl ve..nga nanak tuh kong um ci deap se kei zong Visa nga pai tuh ma zong ka ki sa tha pai laleau hi.

Tua hun lai US Visa tum daan se Zingsang nai 8 zum hon laap tansii a tum hi lel hi.Kei zong tansii /Form teng fill up Interview tuh ngak pai se a thum na khawng khat hong sam a kam thum kam li khawng dong pheang..sorry ci pai laleau a, ka nuai khawng hawng hi le taksuk a bo vadii tu bebek ka thinsung hong suak hi.

Calcutta a ka Visa nga nagwl lai Keima tangval lai hi a keima nguak thuak..a dadaan khat om lai…
Tuh tatak te ka Zi ka tate ka mit tha sung hong suak vanuai a ..kei a tuh Leitung se bang zong hi thong ziam ka ci ni hong hi laleau hi.

US Visa nga kik a ka sunmang a taangtun na thu zom lai tuh khi hi.